LAOAG CITY – Maib-ibosanen ti danom dagiti sumagmamano a fire station idiay Los Angeles, California idiay Estados Unidos gapu iti kumarkaro a mapaspasamak a wildfire.
Segun ken ni Bombo International News Correspondent Rene Ballenas manipud idiay Estados Unidos, nangipatuloden ti Canada ken Mexico ti nayon a puersa dagiti bumbero tapno masebseban ti dumakdakkel nga apoy.
Inbatadna a marigrigatan dagiti firetruck gapu ta saan nga umdas ti danom iti kinalawa ti panagramram ti apoy isu nga agkitkitada ti mabalin a pangalaan ti danom kas ti Pacific Ocean wenno kadagiti swimming pool dagiti hotel.
Inlawlawagna a dumanonen iti binilyon a dolyar ti balor iti pannakadadael ti uram dagiti naruay a pagtaengan pakairamanan dagiti balay dagiti artista, milyonaryo ken bilyornaryo nga indibidual.
Kunana a gapu ta naminpinsan a dimmapo ti adu a pagtaengan ket naruay kadagiti residente ti nagturong kadagiti hotel para iti temporario a pagnaedanda.
Innayonna a basar iti kaudian a datos ket awan ti Pilipino ti karaman kadagiti pimmusay gapu iti nasao a wildfire.
Kabayatanna, bayat a maisursurat daytoy a damag ket saan pay a masinunuo dagiti otoridad ti kangrunaan a rason iti namunganayan ti uram.
