LAOAG CITY – Ginutigot ti Food Industry Asia (FIA) ken International Council of Beverages Associations (ICBA) ti Sugar Regulatory Administration (SRA) nga isuspenso ti baro a pammilin daytoy a nasken nga adda ti permit ken bayad kadagiti importing sugar alternatives.
Iti surat ti grupo ken ni Sugar Regulatory Administration Administrator Pablo Luis Azcona, napateg a maaddaan pay laeng ti konsultasion iti nagbaetanda iti Sugar Regulatory Administration sakbayda nga ipatungpal.
Inrakurak met ti Joint Foreign Chambers of the Philippines (JFC) ken Beverage Industry Association of the Philippines a ti nasao a pammilin ket mangitunda ti panagngato ti presio iti produktoda.
Maipalagip a naiparuk-at ti pammilin gapu iti awan sarday a panag-import dagiti asukar ken sumagmamano a sweeteners iti pagilian.
