LAOAG CITY – Nangisayangkat ti rally dagiti sumagmamano a grupo iti Aurora Park ditoy ciudad ti Laoag kontra iti rebelde a New People’s Army (NPA), kagiddan ti maika-51 a tawen a pannaka-establisar ti CPP-NPA.
Karaman kadagiti nakipagpaser ti rally ket ti Philippine National Police (PNP), Non-government Organizatio, Muslim Association, Laoag City – Ilocos Norte Chapter nga idadaulwan ni Ismael Ali ken adda pay ti dati a rebelde.
Iti panagsarita ni Atty. Roxanne Dy Castro, Legal Officer iti gobierno ditoy ciudad ti Laoag a nangibagi ken ni Mayor Michael Marcos-Keon, inbatad na nga agsardeng koman ti NPA nga agisaknap ti kinadamsak iti nagduduma a paset ti pagilyan.
Kalpasan a nagsarita ni Castro ket nagpasango amin dagiti maseknan iggem da dagiti placard a nakaisuratan ti panangkondenar da ti grupo a rebelde ken naggigiddan da a pinigis dagitoy.
Malaksid iti dayta, adda pay ti tallo a kalapati a pinatayab dagiti nakipagpaset ti rally.
