LAOAG CITY – Saan a pabor ni Mr. Edgar Ambrocio, maysa kadagiti jeepney driver ken operator iti ruta a Laoag-Batac-Paoay iti suhestyun ti OCTAa no mabalin ket dagiti laeng fully vaccinated ti mapalubusan nga aglugan dagiti pampubliko a transportasyon.
Segun kenkuana, narigat daytoy nangruna ket ado pay dagiti saan a nabakunaan ken saan met amin a tattao ket adda ti pribado a lugan da.
Inlawlawag na a no maipatungpal daytoy ket padagsen kadakuada a driver ken ad-adda manen a bumassit ti pasaheros da.
Inbatad na a kadagitoy a gundaway a 50 a porsiento laeng ti mabalin da nga ilugan da ket marigatan da pay gapo ta sumagmamano met laeng ti rumrumuar ken adda met lugan dagiti dadduma.
Kabayatanna, kunana nga adda ti panagamak na iti posible a pannakaikkat dagiti plastic barriers iti lugan da.
Kunana nga iti laksid a nakasuot ti facemask dagiti pasaheros ket awan ti garantiya a saan a makaptan iti virus nangruna ket posible a saanen a masurot ti social distancing.
Inpalgak na a napinpintas kuma no manayunan ti kapasidad ti mailugan da.
