LAOAG CITY – Inbutaktak dagiti sumagmamano a kameng ti Barangay Ranger Officers (BRO) iti ili ti Solsona nga innem a bolanen a saan da nga agsweldo.
Immuna a nainterview ti Bombo Radyo Laoag a kameng ti BRO ket ni Eufemia Tabios iti Barangay Man-anteng iti ili ti Solsona no sadinno a nangrugi laeng a nagtrabaho idi Hulyo 2021 ngem agpapan ita ket awan pay ti naawat na a sweldo.
Segun kenkuana, ti naikari a sweldo ti kada miembro ti BRO iti kada bolan ket 3 ribo a pisos ngem agpapan ita ket saanda pay a nasweldoan.
Kinumpirmaran met ni Barangay Chairman Elpidio Domingo iti Barangay Man-anteng iti ili ti Solsona a maibagbaga kenkuana dagiti kameng ti BRO ti parikot da seknan iti saan da pay a panagsweldo.
Gapu iti daytoy, nagpanawagan ni Kapitan Domingo ken ni Mrs. Baby Sacro, ti Environment and Natural Resources Officer ditoy probinsya a maited koman ti sweldo dagiti kameng ti BRO.
Iti mainaig a damag, inpetteng met ni Mr. Gabino Gabriel, ti Presidente iti BRO iti Barangay Catangraran iti ili ti Solsona a no dadduma ket adda kadakuada nga opisyal no apay a saan a dagus a maited ti sweldo dagiti kameng ti BRO.
Inlawlawag na a ti maysa a pakaladawan ti sweldo dagiti maseknan ket no saan da a maipasa a dagus ti accomplishment report da gapu ta adda dagiti sabali a pakakumikuman da.
Innayon na a naipasigud pay kadagiti kameng ti BRO a saan da a binolan nga agsweldo no naladaw a maipasa da ti accomplishment report da.
Kuna na pay nga uray no maipasa da ti accomplishment report da no awan ti agpirma iti probinsya ket saanda latta a maala ti sweldo da.
Kabayatanna, inadmitir ni Mrs. Sacro a sumagmamano a kameng ti BRO gapu ta masapol a maiproseso amin a dokumento ken listaan dagiti nagbalin a miembro.
Innayon na a daytoy ti kasapulan iti panangiproseso da kadagiti requirements iti Commission on Audit (COA).
Nupay kasta, inpasigurado na a manarimaanen ti pannakaiproseso ti payroll dagiti kameng ti BRO ken manamnama a sakbay nga agngudo ita a bolan ket maited aminen ti sweldo dagiti maseknan.
