LAOAG CITY – Kinumpirmaran ni Civil Security Unit (CSU) chief Ernesto Sadian ditoy siudad ti Laoag a naiyakar ni Mr. Kevin Assuncion a kameng ti CSU iti sanitary landfill ditoy siudad.
Daytoy ket kalpasan a nakalibas dagiti walo a menor de edad iti Bahay Pag-asa sakbay ti panangsarabu ti baro a tawen idi ta Asuncion ti nakaduty.
Inlawlawag ni Sadian a ti pannakaiyakar ket paset iti naipataw a pannusa kalpasan ti insidente babaen ti City Social Welfare and Development Office.
Inbunannag na nga adda ti panagsungbat ni Asuncion babaen ti rimwar a memorandum na.
Kuna na ti inpalawag ni Asuncion ket bayat nga agtuntuno ti barbecue ti maysa a menor de edad ken dagiti dadduma ket adda da iti uneg ti bahay pag-asa.
Innayon ni Sadian a kellaat a simrek ti agtuntuno ken bulon na ti panaglibas dagiti walo a menor de edad.
Naamuan a naiyakar iti ospital dagiti dua a kameng ti CSU nga agbanbantay pay iti nasao a pasilidad.
