LAOAG CITY – Kinumpirmaran ni PLt. Jay Ashley Cacaorin, ti deputy chief of police ti PNP-San Nicolas nga agdama a dumaldalan ti quarantine dagiti sumagmamano a pulis.
Daytoy ket kalpasan a nagpositibo iti covid-19 ni IN-C783, maysa a lalaki nga agatwen ti 48, residente iti Brgy. 18 iti nasao nga idi ken person deprived of liberty (PDL).
Inlawlawagna a naamoan a positibo iti virus ti balod kalpasan a dimmalan iti testing para iti pannakaiyakar na iti mental facility idiay Mandaluyong City.
Immunan nga inpakaamo ni Cacaorin a nagtalinaed iti kustodyarda ti balod manipod Hulyo 16, 2020 ken ti laeng ina na ti kanayun a mangsarsarungkar kenkuana.
Kuna na nga iti agdama ket manarimaan ti contact tracing kadagiti posible a nakapulapol ti nagpositibo a balod.
Kabayatanna, innayun ni Cacaorin a saan pay a masinunuo nu maipan iti lockdown ti PNP-San Nicolas.
