LAOAG CITY – Nagatendar dagiti sumagmamano a kandidato ditoy siudad ti Laoag sakbay ti Tulong Panghanapbuhay sa Ating Disadvantaged/Displaced Workers wenno TUPAD distribution pay out iti Ilocos Norte Police Provincial Office.
Daytoy ti kinumpirmaran ti maysa kadagiti napan immawat ti TUPAD distribution pay out a saanen a nagpabigbig pay.
Segun kenkuana, dagiti maseknan a kandidato ket ti Congressman, dagiti nagpaidasig iti kina-Mayor ken Bise Mayor pakairamanan dagiti nagpaidasig iti kina-Konsehal ditoy siudad.
Inadmitirna nga iti panagbitla dagiti nasao a kandidato ket saan a maliklikan ti panagkampania dagitoy.
Mainaig iti daytoy, kagiddan iti pannakaisayangkat ti TUPAD distribution pay out ket naibunong met dagiti polietos kadagiti benepisiario.
Naammoan nga immawat ti 4,680 a pisos kas sueldo dagiti benepisiario iti uneg ti sangapulo nga aldaw a panagtrabahoda.
Nupay kasta, rumrummuar nga uray saanda a nakumpleto ti sangapulo nga aldaw ket naawatda latta ti buo nga 4,680 a pisos.
Kabayatanna, dagiti barangay a napan immawat ti TUPAD distribution pay out ket manipud iti Barangay Lapaz, Barangay Gabu Norte, Barangay Gabu Sur ken dadduma pay.
