LAOAG CITY – Kiniddaw mismo dagiti kongresista nga ikkatenen kadagiti distritoda dagiti proyekto nga agpapada ken paulit-ulit a mapunpundoan.
Iti budget deliberation iti Senado, inbatad ni Department of Public Works and Highways (DPWH) Secretary Vince Dizon a dua a kongresista ti nagsurat kadakuada kalpasan a nakitada dagiti proyekto iti distritoda a saanda nga ammo.
Naammoan a dagiti kongresista a nagkiddaw nga ikkaten dagiti repetitive projects ket isuda Batangas 3rd District Representative King Collantes ken Iloilo 4th District Representative Ferjenel Biron.
Basar iti inruar a dokumento ni Finance Committee Chairman Sherwin Gatchalian, agpapada a multi-purpose buildings dagiti doble a proyekto ken pundo a nakita idiay Batangas.
Immapela met ni Senador Loren Legarda a no adda dagiti ikkaten a duplicated projects ket nasken a masukatan dagitoy ti dadduma a proyekto tapno saan a maikkatan ti infrastructure projects dagiti nasao a distrito.
