LAOAG CITY – Nagpanawagan ti sumagmamano a labor groups a bumaba iti puwesto ni Baguio City Mayor Benjamin Magalong kalpasan a dinutukan ni Presidente Ferdinand Marcos Jr. kas special adviser ken imbestigador ti Independent Commission for Infrastructure (ICI) a mangtutuk kadagiti kaso nga adda ti pakainaigan iti dagiti infrastructure projects ti gobierno iti napalabas a 10 a tawen.
Basar iti Nagkaisa Labor Coalition, nupay bigbigbigen da ti integridad ken dedikasyon ni Magalong, saan a rumbeng a paggidanen na ti responsibilidad na kas mayor ken ti panagbalin na nga imbestigador ti komisyon.
Innayon ti grupo a mabalin nga agtalinaed kas adviser wenno full-time investigator ni Magalong isut gapuna a rumbeng nga agikkat kas mayor.
Dinakamat pay ti grupo ti Section 7, Article IX-B ti 1987 Constitution, a maipawil kadagiti naelektaran nga opisyal a madutukan iti sabali a posisyon iti gobierno agingga a saan a malpas ti termino.
Pinatibker daytoy ti Korte Suprema iti kaso a Flores v. Drilon idi 1993.
Awan pay ti sungbat ni Magalong iti daytoy a panawagan, ngem inrakurak na iti kallabes nga agtalinaed kas mayor iti ciudad ti Baguio kabayatan a tumultulong iti Independent Commission for Infrastructure.
Basar iti kampo na, saan nga agbalin a miyembro ti komisyon, no di ket mangisumitir laeng kadagiti ebidensya ken dokumento a makolektar na kas paset iti imbestigasyon na.
