LAOAG CITY – Saan a mamati dagiti kaadoan a Lebanese ken dagiti ganganaet idiay Lebanon a bodega ti pagaramidan ti paputok ti bimtak idiay Beirut.
Daytoy ti inbatad ni Bombo International News Correspondent Fedelyn Jover, tubo idiay ciudad ti Davao ken OFW idiay Dhour El Choueir, Lebanon.
Segun kenni Jover, adda dagiti report nga agwarwaras a namulaan ti bomba ti pasdek gapo iti kinapigsa ti panagbettak.
Inbatad na a patyen dagiti tattao idiay Lebanon a naireport laeng a pagaramidan ti paputok ti bimtak tapno maala-ayan ti panagamak dagiti residente.
Kunana nga uray maysa oras ket kagudwa ti kaadayo na manipud iti pagtrabtrabahoan na a balay iti nakapasamakan iti panagbettak ket nakrikna da latta ti panagdayyeg a nangitunda ti panagamak da ken dagiti amo na ken ti ammo da ket nagkimat.
Gapo iti daytoy, kunana a binalakadan isuna dagiti amo na a saan a mapan iti natao a lugar.
Mainaig iti daytoy, inbatad ni Jover nga adda met ti tulong ti embahada kadakuada.
Kabayatanna, kunana a maysa kadagiti pagayam na ti nasugatan ti ulo na kalpasan ti panagbettak ngem saan a naitaray iti ospital gapo ta maamak iti kaado dagiti pasyente ti covid-19.
Innayon na nga iti agdama idiay Lebanon ket nakaro ti gulo, gapo ta saan laeng a ti covid ti problema a sangsangwen da.
