LAOAG CITY – Dinakamat iti panagdengngeg ti Senate Committee on Ways and Means dagiti nagduduma a wagas nga inaramid dagiti Discaya tapno makalibas kadagiti sumagmamano a nababalor a lugan ditoy pagilian.
Inrakurak ni Bureau of Customs (BOC) Commissioner Ariel Nepomuceno dagiti nagduduma a wagas nga inaramid dagiti Discaya tapno makaiserrek ditoy pagilian dagiti luxury cars kas ti saan a panagbayad ti husto, pannagbalbaliw kadagiti dokumento, panangsukat iti X-ray ken panangiserrek nga awan ti import entry ken certificate of payment.
Mamati ni Nepomuceno nga adda ti modus iti panangiserrek kadagiti nababalor a lugan kas ti Bugatti a mapapati a naiserrek idiay Batangas port ngem ti nakaikabil iti import entry ken certificate of payment ket iti Port of Davao daytoy a binayadan.
Inpetteng ni Nepomuceno, saan pay a na-X-ray ti lugan iti port wenno binaliwanda pay ti X-ray gapu ta sabali a lugan ti rimmuar nga imbes a Bugatti.
Adda pay ti Bureau of Customs employees a kakunsabo dagiti Discaya idiay Cebu, Davao, Batangas ken dadduma pay a lugar a manarimaan nga im-imbestigaran ti ahensia.
Adda ti 10 nga empleado ti Bureau of Customs ti naisyuanen ti show cause order idinto a kitkitaen pay laeng ti Customs dagiti importers dagiti luxury cars nga iligal a naiserrek dagiti Discaya ditoy pagilian.
Nupay kasta, inlawlawag ti Bureau of Customs a saan met nga amin kadagiti luxury cars dagiti Discaya ket iligal gapu ta adda ti 17 a lugan a nagatang ti regular manipud kadagiti legal a car distributors.
