LAOAG CITY – Inbatad ni National Bureau of Investigation (NBI) Director Jaime Santiago nga im-imbestigaren da ti sumagmamano a miembro ti mainstream media a possible a maipagarop nga agisaksaknap ti riribok ken sedisyon iti publiko.
Iti baet daytoy, saan a dinakamat ni Santiago no mano ti im-imbestigaren da.
Nupay kasta, kuna na a dagitoy a miembro ti mainstream media ket simmobra iti komento da ken ab-abuswen da ti kinawaya da nga agirakurak.
Inpetteng ni Santiago nga awan ti dakesna no agkomento maikontra iti ar-aramiden iti maysa nga opisyal ti gobierno ken dadduma pay, ngem sabalin a saritaan no pagsasawan dagitoy iti dakes wenno ti makunkuna a below the belt.
Inrakurak daytoy ni Santiago kalpasan nga inbatad ti National Bureau of Investigation a tututukan da ti 20 a vlogger nga agiwarawaras ti fake news iti pagilian.
