LAOAG CITY – Agproblema dagiti agtartaraken ti lames iti Barangay Gabu Sur ditoy ciudad ti Laoag gapo iti panagpisti dagiti taraken da.
Segun kenni dati da Barangay Chairman Gil Ramos iti nasao a barangay, karaman kadagiti ado a matay a taraken da ket ti tilapia.
Inlawlawag na a karaman kadagiti kangrunaan a rason no apay nga agpisti dagiti taraken da a lames ket panagababaw ti danom ken sobra ti apgad.
Kunana a mapatta-patta nga umabot iti 70 nga agtartaraken ti apektado iti panagpisti dagiti sumagmamano a lames.
Maladingitan da gapo ta saan laeng a maysa wenno dua ti matay no diket ado nga isu ti pakalugian da.
Inbatad na nga an-anusan da nga ikkaten dagiti matay a lames iti fish cage da gapo ta mairaman a maperdi dagiti iket da no tuktuken ti kannaway dagitoy.
Mainaig iti daytoy, kunana a maysa kadagiti rason met no apay a naladaw da a nagtaraken ket gapo iti naglabas a bagyo.
Kabayatanna, inbatad na a narigat no agdependar da a kanayon iti ipaay a tulong ti gobierno nangruna ket maipagarop a ti maik-ikkan ket dagiti saan a kwalipikado.
