LAOAG CITY – Inpasingked ni Brgy. Chairman Jose Francisco Ranada ti Brgy. 35 Gabu Sur ditoy siudad ti Laoag a nakasaganada iti baet a saan pay a nakaro iti epekto ti Bagyo Enteng ditoy siudad iti Laoag.
Segun kenkuana, binallaaganna dagiti kabarangayanna a dagus nga agibakwit no bilang kumaro wenno pumigsa iti nasao a bagyo.
Inbatadna nga adda ti pammilinna kadagiti padana nga opisial pakairamanan dagiti barangay tanod a mapanda palagipan dagiti residente kadagiti agnanaed iti asideg iti kabaybayan nangruna kadagiti mangngalap.
Inlawlawagna a nakasagana ti evacuation center a mausar para iti temporario a pagtarusan dagiti kabaragayanna a makapasar iti nakaro a layos.
Kabayatanna, nagballaag ni Kapitan Ranada kadagiti residente a kanayon nga agridam ken makikoordinar kadagiti pagannurutan dagiti opisial ti barangay.
