LAOAG CITY – Maproblemaan dagiti sumagmamano a mangngalap iti Barangay Metro Lapaz ken Barangay Talingaan gapu ta saanda pay laeng a makakalap gapu iti pannakaiwayat ti Balikatan Exercices ditoy siudad ti Laoag.
Segun ken Mr. Benigno Garcia, maysa a mangngalap, dakkel a parikot para kadakuada ti Balikatan Exercises gapu ta napawilanda a mapan agkalap.
Inbatadna nga awan pay ti tulong a naawatda manipud iti gobierno ti temporario a pannakaisardengda nga agkalap ken awan pay ti abiso a naawatda.
Inlawlawagna nga agpaut ti tallo agingga uppat nga aldaw ti Balikatan Exercises.
Kunana a kalpasan ti nasao nga aktibidad ket mabalinda manen ti agkalap ngem maproblemaanda gapu ta bassit ti maalada nga ikan gapu iti epekto ti Balikatan Exercises iti kabaybayan.
Innayonna a makakalapda ti adu nga ikan kalpasan ti maysa a bulan a panagkalma ti kabaybayan.
