LAOAG CITY – Kinumpirmaran ni Mr. Juvito Baldivo, High Value Crops Coordinator nga adon dagiti mannalon a nagsardengen nga agmula ti bawang ditoy probinsya.
Kuna na a dagiti dadduma ket binaliwan dan dagiti imulmula da gapu iti nagduduma a rason.
Inlawlawag na a karaman kadagiti rason no apay a nagsardeng dagiti dadduma a mannalon nga agmula ti bawang ket gapu iti nagsasaruno a bagyo a dimmuprak ditoy probinsya.
Kabayatanna, inrakurak na a ti met rason dagiti dadduma a mannalon no apay a nagsardeng wenno nagbaliw da ti imula ket gapu iti kinababa ti presyo ti bawang.
Innayon na nga adda man ti ipapaay a tulong ti gobierno kadagiti mannalon a naapektaran ti mula na a bawang ngem saan a makaumanay isut gapuna nagdesisyon laengen dagiti maseknan a baliwan ti imula da.
Nupay kasta, mangnamnama ni Baldivo a magutigot to metlaeng dagiti maseknan a mannalon tapno agsubli da nga agmula ti bawang.
