LAOAG CITY – Inbatad ni Sang Bayan Member Jonathan Sagario iti Bacarra, Ilocos Norte a madanaganen dagiti mannalon ditoy probinsya gapu iti agtultuloy a panagbaba ti presyo ti irik gapu iti epekto ti Rice Tarrification Law
Kuna na a maproblemaan dagiti mannalon amangan no saan a magatang dagiti maapit da nga irik ket saanda a makabayad ti utang da nga inusar da a nagtalon.
Segun pay ken ni Sagario, ado dagiti mannalon a mangibagbaga nga isardeng da laengen ti agtalon gapu ta awan met laeng ti maganab da iti panagmula da ti pagay.
Plano dagiti sumagmamano a mannalon ti agtaraken laengen ti nagduduma a dingwen, ngem kuna ni Sagario a saan a kaskari na ti agbaliw ti pamastrekan wenno pagbiagan.
Inlawlawag ni Sagario a napintas ti Rice Tarrification Law gapu ta mairaman iti moderno a wagas ti panagtalon ngem saan a nakita dagiti maseknan nga opisyal ti epekto na kadagiti mannalon.
Innayon na a gapu ta naiyimplementaren ti nasao a paglintegan ket masapol a mangipatungpal koma ti gobierno kadagiti programa a mabalin a makatulong kadagiti mannalon.
Inpakaammo ni Konsehal Sagario nga agtultuloy ti pannakisarsarita da kadagiti mannalon mainaig iti daytoy nga isyu.
