LAOAG CITY – Naladingit nga inpakaammo ni Mr. Richard Dela Cruz, maysa a mannalon ken Gunglo Secretary iti Brgy. San Marcos iti ili ti Dingras a saanda a makamula kadagiti kataltalonanda gapu iti mapaspasaran nga El Niño phenomenon.
Inbatadna a gapu iti nakaro a tikag a mapaspasaranda ket marigatanda ti pangalaanda ti danom a mangsibog kadagiti mulada a pagay ken dadduma pay.
Inlawlawagna a dakkel ti parikotda iti agdama gapu ta saanda a masinunuo no ania ti wagas ti aramidenda tapno masupusupan ti panagpadanom dagitoy.
Inpalgakna nga adu pay ti napilit a nagapasen a mulada gapu ta ages-es metten ti danom ken lumawlawa ti mapaspasaran a tikag.
Innayonna a narigat ti agdama a situasionda ngem mangnamnamada ti ipaay a tulong manipod iti lokal a gobierno para kadakuada a maseknan a mannalon.
