LAOAG CITY – Madlawen dagiti mannalon iti ili ti Marcos ti kinakurang ti danom nga usarenda iti panagtalon dagitoy.
Gapu iti daytoy, naammoan nga agsisinnublat dagiti maseknan a mannalon tapno sapasap a mabenipisiaran dagitoy manipod iti Madangon Dam.
Segun ken ni Mayor Antonio Mariano iti nasao nga ili, nasayaat ti panagtitinnulong dagiti mannalon rason nga awan ti tumaod a parokot kadakuada iti baet iti agdama a mapaspasaranda a dakkel a pannubok iti panagpadanom.
Inbatadna nga adda ti napagnunumoanda tapno maalay-ayan ti kinarigat ti danom a pangalaanda ken awan ti mailanglangi kadakuada maipapan iti panagtalon dagitoy.
Kunana a dakkel ti epekto ti El Nino phenomenon kadagiti mannalon banag a masapol laeng ti wagas a mangtulong kadagitoy babaen iti lokal a gobierno.
Innayonna a nakalukat ken nakasagana ti opisinana a mangidanon kadagiti tulong a kasapulan dagiti mannalon.
