LAOAG CITY – Inpakaammo ni Mayor Richard Degala a nasapa a nagmula ti sumagmamano a mannalon iti ili ti Vintar kadagiti produkto agrikultura dagitoy.
Segun kenkuana, daytoy ket kalpasan nga inadalda a naimbag ti schedule iti panagmula wenno panagtalon dagiti mannalon.
Inbatadna a no saan a maadal a nasayaat ti panagmula dagiti mannalon kadagiti produktoda ket masayang laeng dagitoy.
Inlawlawagna a no madanon ti panawen ti kalgaw ket adda dagiti saan pay a naapit ngem adda dagiti malaylayen gapu iti kinakurang ti danum.
Gapu iti daytoy, kuna ni Mayor Degala, insapsapa nga agmula dagiti mannalon ti tabako a manipud iti dati a maikadua a lawas iti bulan ti Disiembre ket napagbalin nga umuna a lawas ti Nobiembre.
Kunana nga iti agdama ket manarimaan ti panagapit dagiti mannalon kadagiti mula dagitoy a pagay ken tabako.
Innayonna nga awan met pay ti nagkiddaw iti lokal a gobierno ti fuel and oil iti baet ti mapaspasaran a panagngato ti presio dagiti produkto a petrolyo.
