LAOAG CITY – Kiniddaw ni Mr. Danver Dela Cruz, Focal Person ti Regional Agricultural Fishery Council iti National Food Authority – Regional Office I iti gobierno nga idakdakkel ti iyalokar a pundo para iti maipaay nga ayuda kadakuada a mannalon.
Segun kenkuana, daytoy ket kagiddan a ngimmato ti nailatang a pundo para iti Department of Agriculture ita a tawen 2026.
Inbatadna a masapul nga uppat a kaban ti abono ken 10 a ribu a pisos kas tulong pinansial iti kada ektaria a kataltalonan ti maited kadakuada manipud iti nasao nga ahensia ti gobierno nangruna ket sumurok-kumurang nga 60 a ribu a pisos ti magasgastosda iti panagtalon.
Kabayatanna, naragsak nga inpakaammo ni Dela Cruz a dakkel ti naitulong kadakuada a lokal a mannalon ti pannakasuspenso idi ti 60 nga aldaw iti importasion ti bagas.
Nupay kasta, inadmitirna nga adda ti posibilidad a bumabanto manen ti presio dagiti ilaklakoda nga irik gapu iti pannakaipalubos manen iti importasion ti bagas.
Maipalagip nga inbilin ni Presidente Ferdinand Marcos Jr. ti pannakasuspenso iti uneg ti 60 nga aldaw iti importasion ti bagas idi Septiembre 1, 2025.
