LAOAG CITY – Inpakaammo ni Mr. Danver Dela Cruz, Presidente ti San Marcelino Irrigators Association nga adda ti sumagmamano a mannalon a limitarandan ti kalawa ti talonenda gapu iti agtultuloy a panagngato ti presio dagiti produkto a petrolyo.
Segun kenkuana, daytoy ket maysa a wagas nga aramidenda tapno saan unay a nadagsen ti ibaklay a gastosen dagiti padana a mannalon iti baet ti panagngina ti presio dagiti produkto a petrolyo.
Inbatadna a gapu iti agdama nga arungaing dagiti padana a mannalon ket adda ti manamnama a pannakaipaay kadakuada ti fuel subidy ken abono manipud iti lokal a gobierno iti ili ti Dingras.
Inlawlawagna a dakkel ti epektona ti panagngato ti presio dagiti produkto a petrolyo kadakuada a mannalon gapu ta ngumina met dagiti gatgatangenda nga abono para kadagiti mulada a produkto agrikultura.
Innayonna nga adda ti maisayangkat a taripnong inton bigat kadagiti padana nga opisial ti Provincial Agricultural and Fisheries Council tapno mapagnunumoan dagiti nasken nga aramiden dagiti mannalon gapu iti panagngato ti presio dagiti produkto a petrolyo.
