LAOAG CITY – Kinumpirmaran ni Dr. Loida Valenzuela, provincial veterinarian nga adda dagiti manok a nagpisti gapo iti kinabara ti panawen.
Segun kenni Valenzuela, dagiti nagpisti a manok ket isu ti inbunong ti Dept. of Agricutlure iti Region 1 babaen iti Typhoon Ompong Rehab ken Covid Assistance ken naggapo idiay Isabela.
Inlawlawag na a dagiti manok ket simmangpet ditoy probinsya kageddan ti panangrugi ti kinabara ti paniempo kasta pay a maysa a factor ket ti pannakaibyahe dagitoy.
Kuna ni Valenzuela a dagiti naapektaran iti panagpatay dagiti manok iti ili ti Vintar ket agarop 30 agingga manipud kadagiti naibunong.
Mainaig iti daytoy, inbatad na a karaman kadagiti factor a matay dagiti taraken ket gapo iti kinakurang ti danom a mangitunda ti pannaka-hydrate ken agresulta iti pannakatay dagitoy.
Kabayatanna, kuna ni Valenzuela nga awan met ti naireport nga adda ti taraken a mismo ditoy probinsya a natnatay malaksid laeng kadagiti manok a naibunong.
Binalakadan met ni Valenzuela dagiti adda ti taraken na a taripatoen nangruna ita a nabara ti panawen kas iti panangpainum ken panangipaay ti nalamiis nga aglawlaw.
