LAOAG CITY – Inrakurak ti Philippine National Police a naestablisar dan dagiti maipagarop a maaw-awagan ti “angels of death” nga ibilang ti nailian a pulisya a private army ti Kingdom of Jesus Christ leader a ni Pastor Apollo Quiboloy.
Iti press briefing, inbatad ni Philippine National Police spokesperson Police Colonel Jean Fajardo a maipagarop a naalan ni Police Regional Office 11 (PRO 11) chief Police Brigadier General Nicolas Torre III, ti nagan dagiti sumagmamano a miembro ti nasao a grupo.
Immuna iti daytoy, inbatad ti Philippine National Police a basar iti rakurak ti sumagmamano a biktima ti maipagarop a panagabuso ni Pastor Quiboloy, mapangpangtaan da a biruken ida dagiti miembro ti “angels of death” no ipakaammo da iti sabali ti napasamak kadakuada iti uneg ti Kingdom of Jesus Christ Kingdom compound.
Kuna pay ni Fajardo, im-imbestigaren da payen no adda dagiti Army reservists ken militiamen nga agserserbi kas bodyguards ni Quiboloy ti karaman iti “angels of death.”
Innayon na nga agtigtignayen ti Philippine National Police tapno kanselaren dagiti gun licenses dagiti miyembro ti “angels of death.”
Ni Pastor Quiboloy ket agdama a nakabalud iti Philippine National Police Custodial Center iti Camp Crame iti Quezon City gapu kadagiti kaso na a panaglabsing ti Special Protection of Children Against Abuse, Exploitation, and Discrimination Act, karaman ti qualified human trafficking ken adda pay dagiti kaso a sangsangwen na idiay Amerika.
