LAOAG CITY – Nagbinnara dagiti sumagmamano a motorista ken dagiti personnel ti Land Transportation Office ditoy siudad ti Laoag.
Daytoy ket kalpasan a ninamnama dagiti nasurok-kumurang nga 40 a motorista a maalada ita nga aldaw ti driver’s license dagitoy.
Nupay kasta, dimmanon iti tallo nga oras a nagur-urayda iti ruar iti nasao a pangopisinaan ngem napaayda iti napasamak.
Gapu iti daytoy, nadismaya dagiti maseknan a motorista rason nga inpadanonda daytoy a reklamoda ditoy Bombo Radyo Laoag.
Mainaig iti daytoy, apaman a nagturong ti News Team ti Bombo Radyo Laoag iti Land Transportation Office ditoy siudad ti Laoag ket nadanonan ti panagbinnara iti nagbaetan dagiti motorista ken dagiti agpapaay iti nasao nga opisina.
Naammoan a babaen iti panagturong ti News Team ti Bombo Radyo Laoag ket inakomodar met laeng ti nadakamat a pangopisinaan dagiti motorista.
Kabayatanna, segun ken ni Mrs. Susan Gagarin, ti mangidadaulo iti Land Transportation Office ditoy siudad ti Laoag nga adda ti pakabuklan a 76 a motorista ti naakomodar ken naikkan ti driver’s license.
Inbatadna nga adda dagiti sumagmamano a saan pay a kualipikado a makaala ti lisensiada ngem inpanamnamada kadakuada a mapakaammoandanto apaman a nakasagananton dagiti dokumento dagitoy.
Inlawlawagna nga awan ti kinapudnona nga adda ti inpatulod ti opisinada a text message kadagiti maseknan a motorista idi rabii no di ket ti nasao a mensahe ket naipatulod kadakuada daytoy idi aldaw ti Huebes.
Inpalgakna a naobserbaranna nga adda metten dagiti motorista ti nagturong iti opisinada a saanda nga iskedyul a makaala ti lisensiada.
Kunana nga idi laeng kalman ket nagturong laeng dagiti nasao nga indibidual iti pangopisinaanda gapu ta nadanondan ti cut off rason nga inkiddawda nga agsublida laengen ita nga aldaw.
Nupay kasta, kuna ni Mrs. Gagarin ket inakomodarda met laeng amin dagitoy iti baet a saan nga Office Hours gapu ta Sabado ita nga aldaw.
Innayonna a bumasbassit ti suplay ti plastic card ngem saan laeng ditoy siudad ti Laoag wenno probinsia no di ket pakairamanan pay dagiti dadduma a lugar ditoy pagilian.
Kamaudiananna, kiniddaw ti mangidadaulo iti Land Transportation Office ditoy siudad ti Laoag iti naan-anay a pannakaawat ti publiko kadakuada gapu ta ar-aramidenda met amin ti kabaelanda tapno maipadanon iti napintas a serbisio para kadagiti umili.
