LAOAG CITY – Nadadael dagiti sumagmamano a mula dagiti tobacco farmers ditoy siudad ti Laoag gapu iti panagtudona iti kallabes.
Daytoy ti inpakaammo ni Engr. Shiela Opelac, mangidadaulo ti City Agriculture Office ditoy siudad ti Laoag.
Segun kenkuana, nagkuribetbet dagiti mula a tabako dagiti mannalon gapu iti panagtudo wenno iti panagbalbaliw ti paniempo.
Inlawlawagna nga apaman a naammoanda daytoy ket insigida nga inyasidegda iti National Tobacco Administration tapno mamonitor a naimbag.
Inbatadna nga agarup 30% agingga iti 70% ti kaadu dagiti nadadael a mula.
Kunana a dagiti kangrunaan a naapektaran ti mulada a tabako ket iti Barangay Bacsil South, Barangay Lataag ken Barangay Bacsil North.
Innayonna a ti pagsayaatanna ket adda ti insurance dagiti mannalon a dakkel a makatulong kadakuada no adda ti kastoy a mapasamak kadagiti mulada.
