LAOAG CITY – Mabuteng dagiti sumagmamano a nagannak a pabakunaan dagiti annak da iti Anti-Human Papillomavirus wenno HPV vaccine ditoy ciudad ti Laoag.
Daytoy ti inpakaammo ni Ms. Rowena Nicolas, Nurse 3 iti Laoag City Health Office.
Kuna na a daytoy ket resulta ti naglabas a vaccination campaign partikular idi panawen ti pandemya a gubuay ti covid-19 nga adda dagiti maipagarop a side effects dagiti bakuna a naitudok kadakuada.
Nupay kasta, kunana a saan nga agbalin a lapped daytoy iti kalikagum da a mabakunaan dagiti babbai tapno maprebentaran ti cervical cancer aglalo ket iti napalabas a tawen ket adda ti nairekord a pito a kaso ditoy ciudad a maibilang kas kangatoan ditoy Ilocos Norte.
Innayon na a 83% ti populasyon dagiti Grade 4 student ti nabakunaan iti napalabas a tawen isut gapuna nga ita a 2025 ket i-extend da ti agbakuna kadagiti agtawen ti 9 agingga iti 14 a babbai.
