LAOAG CITY – Agrekreklamo ti sumagmamano a nagannak ti Caaoacan High School mainaig iti maipagarup a sobra a bayadan dagiti annakda para iti graduation.
Basar iti pannakisarsarita ti Bombo Radyo iti Principal ken ti Grade 10 Adviser a saanen a nagpabigbig pay nga awan ti nayon a masingir kadagiti estudiante para iti graduation.
Inbatadna a basar iti nagresultaan ti taripnong dagiti nagannak iti kallabes ket umabot iti dua a ribu a pisos ti bayadanda a para iti toga, pictorial, upa ti sound system ken dadduma pay.
Malaksid iti daytoy, karaman pay ditoy ti para iti misa, recognition ken graduation nga agpapada a maisayangkat inton Marso 30.
Nupay kasta, aklonen ti pagadalan a bayadan ti dadduma pay a kasapulan kas ti medal ken certificate nga alaenda daytoy iti Maintenance and Other Operating Expenses tapno saanen a nayon pay a paggastoan dagiti nagannak.
Mamati dagiti school staff a mabalin a ti dakdakamaten ti agrekreklmo a nayon a bayadanda para iti graduation ket dagiti school fees kas ti sports development fee, Laoag City Athletic Association fee a 150 a pisos, Parents and Teachers Association fee a 150 a pisos, 100 a pisos nga school paper, 60 a pisos nga step fee ken dadduma pay.
Karaman pay a bayadan ket ti pagianan ti cleaning materials a 150 a pisos, vase vote wenno popularity contest a 75 a pisos a dagitoy ket inisyatibo a proyekto ti Parents and Teachers Association no sadinno nga adda ti pakabuklan a 745 a pisos.
Inpaganetget ti pagadalan a saan nga isuda ti nangikeddeng kadagiti mabayadan dagiti estudiante no diket sinurotda laeng dagiti singasing dagiti nagannak.
Naammoan a gapu iti kinabassit ti populasion ti pagadalanda ket dakdakkel ti paggugudoaan dagiti estudiante nga umabot laeng iti 61 ti agturpos, 40 ti Junior High School idinto a 21 ti Senior High School.
