LAOAG CITY – Nakagun-od ti tallo a Guinness World Record title dagiti nagatendar iti National Beard and Mustache Championships idiay Florida, U.S.A.
Naisayangkat ti event iti Daytona Beach no sadinno napagtitipon dagiti bigotilyo ken balbas sarado. Tallo a world record titles ti ginandat a maala dagiti nagatendar iti event ken daytoy ket ti “Longest Beard Chain,” “Longest Mustache Chain” ken “Longest Partial Beard Chain.”
Nangrugi ti tinawen nga event idi Oktubre 2011 tapno pagtitipunen dagiti beard and mustache afficionado iti intero a North America.
Inaramidda daytoy tapno agbalin a coordinated dagiti competition ken events nga adda ti pakainaiganna iti iming ken balbas.
Ti umuna a world record title, ti “Longest Beard Chain” ket nakisalipan dagiti 86 a tattao no sadino inipit babaen ti clip dagiti balbasda tapno mapagsisilpo dagitoy.
Dimmanonen ti 195 a kadapan ken 3 a pulgada ti beard chain-da.
Ti maikadua a world record title a “Longest Mustache Chain” ket nakisalipan dagiti 27 a bigotilyo ken dimmanon ti mustache chain ti 20 a kadapan ken 4 a pulgada.
