LAOAG CITY – Nauram ti walo a pasdek negosio iti Barangay 16 ditoy siudad ti Laoag.
Basar iti inisyal nga imbestigasion ti Bureau of Fire Protection, nangrugi ti uram iti maysa a paglakoan kadagiti construction supplies agingga a nagramram ti dakkel nga apoy kadagiti kaabayna a pasdek negosio kas ti paglakoan ti motorcycle parts, ace marketing, barber shop, shoe shop, school supplies, eye clinic ken law office.
Narigatan dagiti bumbero a makastrek kadagiti pasdek negosio gapu iti napuskol nga asok kadagiti nauram a light materials ken nagduduma a produkto iti uneg kadagiti nagduduma nga establishimento.
Naammoan nga adda ti maysa a baket ken maysa a kaduana ti adda iti maseknan nga establishimento idi napasamak ti insidente a nagsagaba ti minor injuries.
Mainaig iti daytoy, inpakaammo ni Barangay Chairwoman Jocelyn Samonte, insigida a binagkat ken inikkatda dagiti motorsiklo a naka-parking iti kalsada nga asideg iti nakapasamakan ti uram a kaaduan kadagitoy ket naka-lock.
Inpasigurado met ni Mayor Bryan Alcid nga adda ti 49 a fire hydrants ditoy siudad ti Laoag para iti al-alisto a panagresponde kadagiti uram.
Kabayatanna, kuna ni Fire Senior Inspector Edison Reyes, City Fire Marshal ti Bureau of Fire Protection ditoy siudad ti Laoag a manarimaan pay laeng ti panangduktalda ti namunganayan ti uram ken balor dagiti nadadael gapu iti insidente.
