LAOAG CITY – Naibusanen ti lako a face mask dagiti sumagmamano a pagtagilakoan idiay China.
Daytoy ket gapu iti kaado dagiti aggatang kalpasan nga adda dagiti nairekord a nagpositibo ti coronavirus iti nadakamat a pagilyan.
Iti report ni Bombo International Correspondent Remelie Agtarap Jose, taga Baggao, Cagayan ngem agdama nga agtrabtrabaho kas factory worker idiay China, ado dagiti nagturungan da a pagtagilakoan ngem naibusen ti lako da a face mask.
Segun kenkuana, kalpasan a naipadamag ti nasao a virus ket nagdudupudupen dagiti napan naggatang nasao a mask.
Inadmitir na nga adda ti panagamak da a Pilipino iti nasao a pagilyan isut gapuna a kanayunen a naka-face mask da ken likliklikan dan ti agturong kadagiti pampubliko a lugar.
Ti coronavirus ket karaman iti maysa a dakkel a grupo dagiti virus nga aggapo kadagiti ayop a mabalin a maakaran ti tao.
Sumagmamano kadagiti sintomas ti coronavirus ket panaggurigor, uyek ken narigat a makaanges, ken no kumaro ket mangitunda ti kidney failure ken pakatayan ti agsagsagaba iti nasao a klase ti sakit.
