LAOAG CITY – Agsasaruno dagiti panagsanay nga isayangkat ti Provincial Resiliency Office iti pannakibinnulig dagiti National Government Agencies iti daytoy a bulan ti Marso.
Segun ken ni Mr. Michael Pe Benito ti nasao a pangopisinaan, umuna ditoy ti Water Safety and Rescue Training.
Inbatadna nga agpaot ti nasao a panagsanay iti uneg ti lima nga aldaw iti Marcos Stadium.
Malaksid iti daytoy, namnamaenna nga ipalubos ti Northwestern University a mausar ti swimming pool dagitoy gapu ta masapol nga aguneg iti sangapulo ket dua a kadapan ti pool a mausar iti iyuswatda a panagsanay.
Inlawlawagna a karaman kadagiti naimbitaran nga agatendar iti nasao a panagsanay dagiti pannakabagi ti 505 Search and Rescue ti Philippine Air Force ti pannakabagi ti tunggal departamento ti gobierno probinsial pakairamanan ti dua a pannakabagi dagiti Local Government Units.
Kunana a nagawisda kadagiti Local Government Units tapno makumpleto ti duapulo ket lima nga slots a kasapulan ti maysa a klase para iti Water Safety and Rescue Training.
Kabayatanna, inpakaammo ni Pe Benito a ti sumaruno ket Basic Life Support Training.
Segun kenkuana, maplanplano iti agdama a a panakaiyuswat iti daytoy a panagsanay.
Inlawlawagna a dagiti puntiria manen a maipadalan iti nasao a panagsanay ket dagiti empleado ti gobierno probinsial.
Imbatadna a kangrunaan a rason iti daytoy ket tapno adda dagiti alisto a maawagan dagitoy a tumulong no adda dagiti saan a mapakpakadaan nga insidente.
Malaksid iti daytoy, inpakaammona a gapu ta ti bulan ti Marso ket Fire Prevention Month, inlungalongda a maiyuswat ti Fire Safety Seminar ken dagiti met laeng empleado ti gobierno probinsial ti makipaset ken maisarsarunonto dagiti national agencies ken Local Government Units nga interesado a dumalan iti nasao a seminar.
