LAOAG CITY – Agrekreklamo dagiti sumagmamano a panganan ditoy ciudad ti Laoag gapu iti pannakaabuso ti Identification Card dagiti Persons with Disability.
Daytoy ti inbatad ni Presiding Officer/Vice Mayor Rey Carlos Fariñas kabayatan ti regular session ditoy ciudad.
Kunana a masapol a mailanad iti identification Card ti maysa Person with Disability no ania ti rangkap ti bagina ken masapol ti naiget a panagmonitor ti Persons with Disability Office ditoy ciudad iti daytoy a banag gapu ta ado dagiti mangpekpeke ti card na.
Mainaig iti daytoy, inpakaamo ni Sang Panlungsod member Justine Chua a basar ti Persons with Disability Office ket awan pay ti namonitor da a peke nga Identification Card wenno ti agpampammarang nga adda ti rangkap ti bagina a residente ditoy ciudad ti Laoag.
Kunana nga strikto iti Persons with Disability Office iti panagmonitor iti daytoy a banag gapu ta adda pay ti screening da kadagiti mapan mangala ti card na iti opsina da.
Kabayatanna, naipasa ti maysa a resolusyon a mangmandar kadagiti opisyal ti barangay ditoy ciudad ti Laoag a mangasistir ken tumulong kadagiti addaan ti rangkap ti bagi a kalugaran da a mapan agparehistro para iti panangala da ti Identification Card tapno magundawayan da dagiti benipisio ken seribisio a naikeddeng a para kadakuada.
