LAOAG CITY – Agdadanag manen dagiti residente iti Barangay Dipilat iti ili ti Vintar kalpasan nga adda dagiti pangganakan a baboy a pimmusay.
Daytoy ti inbatad ni Barangay Chairman Nick Foronda iti nadakamat a barangay.
Inpakaammo ni Foronda a naalaanen ti blood sample dagiti baboy nga adda iti asideg dagiti immunan a naitabon a dingwen.
Innayon ti kapitan nga iti agdama ket adda da manen dagiti baboy nga agmamayo iti barangay da.
Nupay kasta, mangnamnama ni Foronda a negatibo iti African Swine Fever (ASF) virus dagiti pimmusay a baboy iti barangay da.
Maipalagip nga iti Barangay Dipilat ti immuna a nakairekordan ti ASF virus iti ili ti Vintar iti kallabes no sadinno nga umabot iti 581 a baboy ti naisakrispisyo.
Agamak ti kapitan a no agpositibo manen ti ASF virus dagiti pimmusay a baboy ket nalawlawan ton ti masakupan ti virus iti lugar da.
