LAOAG CITY – Nag-courtesy call iti opisina ni Vice Governor Cecilia Araneta Marcos dagiti pannakabagi ti Food and Drug Administration a da Director Gamel Gabuna, Atty. Emilio Polig ken dagiti dadduma pay nga empleado a nakabase ditoy probinsia.
Kabayatan ti panag-courtesy call ket napagsasaritaan ti posible a pannakaestablisar ti satellite office ti Food and Drug Administration ditoy probinsia tapno naig-iget ti pannakaipakat kadagiti paglintegan seknan iti pannakaprotihir ti salun-at ti publiko ken pannakailako dagiti agas ken dadduma pay a medical devices ditoy probinsia.
Nupay kasta, manarimaan pay laeng ti pannakabirok iti napintas a lokasion a mabalin a pakaestablisaran ti nasao nga opisina.
Mainaig iti daytoy, inpasigurado ni Vice Governor Marcos a ti Sangguniang Panlalawigan ken administrasion ni Governor Matthew Marcos Manotoc ket naiget ti sumuporta iti biang ti Food and Drug Administration.
Innayonna a no adda dagiti kasapulan a gakat a nasken a maipasa ket suportaran ti hunta probinsial maiyataday iti kasapulan ti Food and Drug Administration la ket di maisagot daytoy kadagiti umili ken mangpatalged ti sektor ti salun-at.
