LAOAG CITY – Naiwarang dagiti sumagmamano a pansion iti Mangato Public Cemetery ditoy siudad ti Laoag.
Segun ken ni Brgy. Chairman Norbel Esteban iti nasao a barangay, posible a daytoy ket gapu kadagiti naglabas a bagyo a dimmuprak ditoy probinsia a nangitunda ti pannakaiyanod dagitoy.
Inbatadna a saanda a ginargaraw dagiti agkaiwarang a pansion gapu ta saanda met masinunuo no asino ti akin-kabagian dagiti natay.
Inpasingkedna a sakbay a madanon ti fiesta ti minatay ket maiplastar ken maiyurnos a naimbag dagiti agkaiwarang a pansion nga isu met ti pagam-amkan ken pagbutbutngan dagiti sumagmamano nga agturong iti kamposanto.
Mainaig iti daytoy, inpakaammo ni Kapitan Esteban a kabayatan ti panag-mapping-da ket naduktalanda a saan a sakupen ti barangayda dagiti agkaiwarang a pansion no di ket iti Brgy. Balatong ditoy siudad ti Laoag.
Gapu iti daytoy, kunana a manarimaan ti pannakikoordinarna kadagiti maseknan a barangay officials.
