LAOAG CITY – Agrekreklamo ti sumagmamano a pasahero iti Laoag-Pasuquin modern jeepney gapu iti maipagarup a panagipangato ti plete.
Daytoy ket iti baet ti pammilin ni Presidente Ferdinand Marcos Jr. a pannakasuspenso ti pannakaipangato ti plete kadagiti public utility vehicle pakairamanan dagiti jeepney, bus ken transport network vehicle services iti intero a pagilian.
Iti panagturong ti Bombo Radyo Laoag News Team iti Laoag-Pasuquin modern jeepney terminal, inbatad ti maysa kadagiti dispatcher nga adda ti uppat a pisos a nayon a plete a singsingirenda kadagiti aglugan a pasahero kadakuada.
Iti panagsalsaludsod ti News Team, nagkedkeden a mangipaay ti naan-anay pay nga impormasion ti nasao a dispatcher ngem kunana a nasaysayaat a ti mangidadaulo iti kooperatibada ti sumungbat kadagiti pakaseknan iti panagpasadada.
Naammoan nga adda ti 28 a modern jeepney ti agdama nga agpaspasada iti ruta a Laoag-Pasuquin.
Maipalagip nga inkari ti gobierno a mangipaay ti fuel subsidy, tulong pinansial para kadagiti drivers ken mangiyimplimentar ti libreng sakay para kadagiti pasahero.
