LAOAG CITY – Na-stranded dagiti sumagmamano a pasahero nga agturong idiay Tuguegarao City, Cagayan iti maysa a bus terminal ditoy siudad ti Laoag ita a bisperas ti paskua.
Segun ken ni Mr. Gilbert Pailot a taga ili ti Pasuquin, maysa kadagiti pasahero a na-stranded, idi pay laeng rabii nga agur-uray isuna iti paglugananna a bus ngem kanayon a mapunno ti lugan.
Inbatadna a narigat ti agbiahe ita a bisperas ti paskua gapu ta dupudop dagiti padana a pasahero nga agturong iti bus terminal.
Inlawlawagna a saan a makalugan ti maysa a pasahero nga awan ti maipakitana a ticket ken maipatpatungpal ti first come first serve basis.
Kunana nga aguray isuna agingga inton rabii tapno laeng makalugan iti bus ken makitana dagiti pamiliana idiay Cagayan nangruna ket nabayagen a saan a nakaawid iti lugarda.
Immuna iti daytoy, inpakaammo ni Mr. Jonny Ibac, dispatcher iti nasao a bus terminal, idi pay laeng Biernes, Disiembre 20 ket nangrugin nga agdudupudop dagiti pasahero nga agawid ken rummuar ditoy probinsia.
