LAOAG CITY – Timmama ti napigsa a 7.7 a ginggined idiay Panama iti parbangon ti Sabado, Oktubre 10, 2026, a segun iti report ti United States Geological Survey (USGS).
Nairekord ti epicenter ti gingined iti probinsia ti Herrera asideg ti Pitaloza Arriba, no sadinno nangitunda daytoy ti nalawa a pannakadadael kadagiti pagtaengan, kalsada ken dagiti imprastraktura.
Sumagmamano kadagiti nadadael a pasilidad ket ti maysa a hotel, daan a simbaan ken maysa a pasdek ti gobierno iti lugar ti Penonomé, ken iti pannakaputol ti suplay ti kuryente iti innem a probinsia.
Gapu iti daytoy, temporario a nasuspenso dagiti biahe ken operasion iti Tocumen International Airport kas paset ti panangsurot iti safety protocol.
Kabayatanna, basar iti immunan nga imparuk-at a report dagiti otoridad, awan ti nairekord a natay iti insidente ngem addan ti nairekord a 15 nga estudiante a nagsagaba ti minor injuries.
