LAOAG CITY – Mapatta-patta nga umabot ti 215 ribo a pisos ti balor dagiti nadadael iti pannakauram ti sumagmamano a paset ti dua a palapag a balay iti Brgy. 48-A, Cabungaan ditoy ciudad ti Laoag.
Daytoy ti inbatad ni Senior Fire Officer 1 Rommel Hilario, ti chief Investigator iti Bureau Of Fire Protection (BFP) ditoy ciudad.
Segun kenni Hilarion, karaman dagiti nauram ket dagiti nababalor a cellphone ken ti cash a nasurok a 20 ribo a pisos.
Binigbig ni Hilario dagiti agasawa nga agtagikua ti balay nga isuda Rey ken Merlita Valeriano.
Inlawlawag ni Hilario nga iti panagimbestigar da, naamoan da iti anak dagiti agasawa a ni Joefrey ket incharge na ti baterya ti vape na iti rabaw ti cabinet sakbay a pimmanaw a napan nagtrabaho.
Innayon ni Hilario nga iti panagsawar da iti nakapasamakan ti uram ket naduktalan da nga iti cabinet ti nangrugyan ti apoy isut gapuna a dakkel ti pammati da a gapu iti naicharge a baterya ti vape ti nangitunda ti uram.
Kuna pay ni Hilario a saanen a nagramram ti apoy gapu ta adda ti Portable Fire Extinguisher ti pamilya Valeriano nga isu ti inusar da a nangsebseb ti apoy.
