LAOAG CITY – Nangiparuk-at ti baro nga Executive Order ni Mayor Fritzie dela Cruz-Gapasin iti ili ti Bacarra mainaig iti pannakaipatungpal ti lockdown kadagiti sumagmamano a pagtaengan iti nasao nga ili.
Daytoy ket addang tapno maliklikan ti panagwaras ti covid-19.
Basar iti inparuk-at nga EO No. 2021-016 ti mayor, karaman iti lockdown dagiti masakupan a pagtaengan iti Sagisi St., L. Acierto St. ken paset ti Quezon Blvd. iti Brgy. 15 San Roque pakairamanan ti Purok 4 ken Purok 5 iti Brgy. Duripes iti nasao nga ili.
Nailanad pay iti nasao nga EO a dagiti laeng essential workers ti mapalubusan a rumuar ken maipatungpal ti strikto nga stay at home order kadagiti naipan iti lockdown a lugar.
Kasta met a saan a mapalubusan ti mass gathering ken ti kasapulan dagiti residente a naapektaran ket maipaay babaen ti tulong dagiti opisyal ti barangay.
Kabayatanna, saan pay a masinunuo ti panagngudo ti lockdown kadagiti nadakamat a lugar.
Maipalagip nga immunan a naipatungpal ti liquor ban iti ili ti Bacarra ken ti pannakaipawil ti dine in kadagiti panganan pakairamanan ti pannakairikep dagiti sumagmamano a pagpasyaran iti baybay, karayan ken dadduma pay.
Iti agdama ket addan ti 18 nga aktibo a kaso ti covid-19 iti ili ti Bacarra.