LAOAG CITY – Naserraan dagiti sumagmamano a paset ti kalsada iti Brgy. 21 iti ili Sarrat pakairamanan ti pannakapugsat ti main line iti Ilocos Norte Electric Cooperative gapu iti napigsa a tudo ken angin.
Daytoy ti inpakaammo ni Brgy. Chairman Romeo Hermano iti nadakamat a barangay.
Segun ken ni Hermano, ado dagiti kayo a natultulid nu sadino a sumagmamano a pagtaengan pay dagiti natupakan.
Kabayatanna, kuna na nga awan met dagiti nadangran nga indibidual.
Immunan nga inbatad ni Hermano a saan na nga inpagarup a dakkel ti nagbalin nga epekto ti kellaat nga isasaplit ti napigsa a tudo.
Inpakaammo ti kapitan nga adda ti temporaryo a panagpukaw ti suplay ti kuryente gapu iti pannakaperdi ti linya ngem naisubli met laeng a dagus kalpasan ti sumagmamano nga oras.
