LAOAG CITY – Adda ti panagregaay ti daga iti sanitary landfill a pakaikabkabilan kadagiti basura a makolektar ditoy ciudad ti Laoag gapo iti nakaro a panagtudtudo na a gubuay ti bagyo Florita.
Daytoy ti inbatad ni Engr. Manuel Aurelio, Assistant City Engineer ditoy ciudad ti Laoag.
Inlawlawag ni Aurelio a naiget ti panangmonitor da iti lugar tapno maaksyunan da a dagus no bilang kumaro ti sitwasyon kangrunaan na ti panagreggaay ti daga iti sanitary landfill.
Innayon pay ni Aurelio nga ita a panawen ti tudtudo ket marigatan dagiti truck a sumrek iti nasao a sanitary cell, isut gapuna nga ikabil da paylaeng dagiti basura iti maysa a compound ken apaman a sumayaat ti paniempo ket maiyakar dagitoy iti sanitary landfill.
Mainaig iti daytoy, inpakaammo ni Aurelio nga adda ti 21-milyon a pisos a nayon ti pondo para iti environmental development ita a tawen.
Innayon na nga addan dagiti proyekto a nakailatangan ti nasao a pondo ngem saan da paylaeng a maiyimplementar gapu ta ururayen da paylaeng ti bid na.
Inpanamanama na nga apaman a maawat da iti bid iti nasao a pondo ket maiyimplementar a dagus dagiti nagduduma a proyekto iti opisina da.
