LAOAG CITY – Nauram ti sumagmamano a paset ti sanitary landfill iti ili ti Dingras.
Segun ken ni Fire Officer 2 Marlo Sacramento, Team Leader ti Bureau of Fire Protection iti nasao nga ili, agarup 09:25 ti rabii idi kalman, nakaawatda ti tawag manipud iti maysa a concern citizen a nangipakaammo kadakuada nga adda ti maur-uram iti sanitary landfill.
Gapu iti daytoy, kunana nga insigida a nagresponde dagiti bumbero iti lugar ken nadanonda ti dakkel nga apoy ken napuskol nga asok.
Inbatadna nga umabot iti 100 square meters ti kalawa ti paset ti nauram no sadinno a kaadoan kadagitoy ket dagiti basura a plastik a nangitunda ti alisto a panagramramna.
Inlawlawagna a nagkiddawda pay ti tulong manipud iti Bureau of Fire Protection iti ili ti Solsona ken immabot ti lima nga oras sakbay a naan-anay a nasebseban ti apoy.
Naammoan nga umabot iti 2 a katao ti kauneg ti nauram a sanitary landfill.
Iti agdama, agtultuloy ti imbestigasion ti Bureau of Fire Protection mainaig iti napasamak nga uram iti ili ti Dingras.
