LAOAG CITY – Inbatad ni Mr. Noel Tablada, ti mangidadaulo iti Fertilizer and Pesticide Authority ditoy probinsya nga adda ti naduktalan da a mailaklako a peke a pesticides manipod iti ili ti Bacarra agingga iti ili ti Pagudpud.
Naamoan da daytoy kabayatan ti panangiwayat da ti inspeksyon kadagiti 52 nga establisimiento nga aglaklako kadagiti agricultural products ditoy probinsya.
Segun ken ni Tablada, ti peke a pesticides a naduktalan da ket tinulad da ti Frontier Herbicides no sadinno nga iti kallabes ket ti laeng pakailaklakoan na ket iti online.
Inlawlawag na nga adda ti pagilasinan no peke wenno saan ti nasao a produkto, partikular iti kalob ti botelya, dagiti naipan a label na ken dadduma pay.
Malaksid iti daytoy, inpakaammo na a no lehitimo ti produkto napalet ti kargana no kulugen idinto a ti peke ket arigna danom.
Inbalakad met ni Tablada a no nababbaba ti presyo a maididiaya ikompara iti orihinal a presyo na ket agbalawen amangan no daytoy ket peke wenno saan.
Mainaig iti daytoy, kuna ni Tablada a nakakumpiskar da ti dua a botelya iti ili ti Bacarra idinto nga 48 a botelya iti ili ti Pagudpud.
Kabayatanna, kuna ni Tablada a nakikoordinar metten iti Fertilizer and Pesticide Authority iti Region 2 partikular iti Cagayan Valley gapu ta nadakamat ti maysa a babai a napan naglako kadagiti peke a produkto a taga Isabela .
Positibo met a binigbig ti Fertilizer and Pesticide Authority iti Region 2 ti san a nainaganan a babai gapu ta agpada da iti deskripsyon iti napan metlaeng nangbiktima iti nasao a rehiyon.
Inkalintegan ni Tablada a dagiti establisimiento a nakakumpiskaran da kadagiti peke a pesticides ket awan ti maipataw kadakuada a pannusa gapu ta nagbalin laeng dagitoy a biktima manipod kadagiti manangallilaw a tattao.
