LAOAG CITY – Pinapangas laeng dagiti inrakurak ni Presidente Rodrigo Duterte kabayatan ti State of the Nation Address (SONA) na a naaramidan na iti makatawen.
Daytoy ti inbatad ni Fr. Rev. Noel Dacuycuy iti Iglesia Filipina Independiente iti ili ti Nueva Era.
Segun kenni Dacuycuy, kangrunaan kuma a makita iti programa ti gobierno ket agserbi kadagiti umuli kas kadagiti mannalon, mangalap ken dagiti adda iti baba wenno marigrigat.
Inpetteng na a no adalen a nalaing dagiti programa ti gobierno ket saan a maiyannatop iti arungaing dagiti umili no diket dagitoy pay ti kangrunaan a maap-apektaran partikular ti Train Law.
Innayon na a dagiti nagbalin a kari ti presidente ket saan a natungpal ken saan na a pulos a tungpalen.
Kabayatanna, ibilang ni Atty. Domingo Cayosa, ti Presidente ti Integrated Bar of the Philippines (IBP) a napintas dagiti nagbalin a rakurak ni Presidente Duterte iti SONA.
Daytoy ket uray saan a nadakamat amin ti presidente dagiti kalikagom dagiti Pilipino a mangegan manipud kenni Duterte.
Segun kenni Cayosa, ti ibilang na a napintas iti SONA ket ti panangadmitir ni Duterte ti nagkurangan ken saan na pay a naubraan bayat ti termino na.
Maysa pay kadagiti ibilang na a makatulong kadagiti tattao a kalikagom ti presidente ket ti mandatory ROTC.
