LAOAG CITY – Mabutbuteng dagiti sumagmamano a Pilipino nga adda idiay Kenya gapu iti kumarkaro a tignay-protesta iti nasao a pagilian.
Daytoy ti inpakaammo ni Bombo International News Correspondent Lou Biating manipud idiay Kenya.
Segun kenkuana, adda ti naiget a ballaag ti gobierno iti Kenya kadakuada a saan pay laeng a rummuar kadagitoy a gundaway tapno maliklikan a mairaman iti agtultuloy a riribuk.
Inbatadna a nakarikep dagiti amin a pasdek-negosio, pagadalan ken dadduma pay kas paset ti panagan-annad dagiti umili ken estudiante iti nadakamat a pagilian.
Inlawlawagna a namunganay ti pannakaiwayat ti tignay-protesta kalpasan ti pannakailungalong ti gakat a manayunan ti buis dagiti magatgatang.
Kunana nga iti agdama ket naruay nga umili ti marigrigatan idiay Kenya gapu iti nangina a presio dagiti kangrunaan a magatgatang.
Gapu iti daytoy, inpalgakna a nupay inbabawi ni Kenyan President William Ruto ti nasao a gakat ket saan latta a nagsardeng dagiti protesters a nangiwayat ti tignay-protesta agingga a saan a bumaba iti puesto ti Presidente.
Immuna iti daytoy, adda ti sumurok 20 nga indibidual ti pimmusay gapu iti pananglapped dagiti pulis ken suldado kadagiti protesters.
