LAOAG CITY – Inpakaammo ni Bombo International News Correspondent Mary Ann Molina manipud idiay Lebanon a saanda pay laeng nga agawid ditoy Pilipinas iti baet ti kumarkaro a tension iti nagbaetan ti Hezbollah ken ti Israel.
Segun kenkuana, daytoy ket kalpasan nga adayo kadakuada iti lugar a pakapaspasamakan ti riribuk iti nagbaetan dagiti dua a grupo.
Nupay kasta, inlawlawagna nga adda met ti pakdaar ti gobierno kadakuada a saan pay laeng unay a rumrummuar kadagiti pagpapaayanda a pagtaengan no saan unay a napateg tapno maliklikan ti dakes a mapasamak kadakuada.
Kunana nga inpasingked ti amona a saanna a baybay-an isuna aniaman ti mapasamak iti pagilianda.
Mainaig iti daytoy, kuna ni Molina a nakasagana ti embahada ti Pilipinas a tumulong kadagiti padana nga Overseas Filipino Worker para iti repatriation dagitoy agingga a nakalukat pay laeng ti eropuerto.
Kabayatanna, naammoan a 29 a tawenen nga agpapaay ni Molina kas Overseas Filipino Worker idiay Lebanon.
