LAOAG CITY – Kinumpirmaran ti Embahada ti Pilipinas idiay Doha, Qatar nga adda ti sumagmamano a Pilipino a naarestar ken naibalud iti Arab country gapu iti saan nga otorisado a political demonstrations ita nga aldaw Biyernes, Marso 28.
Iti maysa nga statement, inbatad ti Embahada a nakikoordinar dagitoy iti lokal nga otoridad iti Qatar tapno mangipaay ti maiyannatop a tulong para kadagiti nasao a Pilipino.
Saan a dinakamat ti Embahada no adda pakainaigan ti nalawa a protesta ti naiyusway kagiddan ti maika-80 a kasangay ni dati a Presidente Rodrigo Duterte ita nga aldaw.
Immunan nga inpetteng ti Embahada iti advisory na para iti amin a Pilipino nga adda idiay Qatar nga agtungpal kadagiti pagannurutan iti pagilian mainaig kadagiti panagtitipon ken panangiyuswat ti tignay protesta nga addaan ti tem a political.
